琴晚攪到成天光先訓!其實都唔知做過咩架!本來今日要打青少盃,不過因為對手比人取消左資格,所以連比賽都唔駛打!但就算有得打,結果都一樣,因為我地已經無緣8強!所以都係決定0係屋企訓覺!訓到差不多夠鐘返工!今日唔係好想返工,因為有波打,琴日已經打唔夠,好想今日發洩下!但又搵唔倒人頂返工,同埋又想賺多D$,所以算啦!返就返啦!星期日既BAR END真係好難搵倒人頂!所以決定放棄!今日返15:30-23:15 6C,接ANGIE個BAR!一返到去就同我講今日D同事既野!都覺得幾攪笑,同埋唔知點解佢話今日個FLOAT少左$12,算啦!是但,17:00左右去食飯!食咁耐就講足咁耐電話,不過D人真係好無記性!算數!之後落左去幫大隻妙入場!今日有個以前0係度做既同事黎左,其實我已經唔記得佢叫咩名,不過佢黎親睇戲都有同我打招呼,而且佢係平姐個妹既仔!所以佢之前入黎做我都同佢有兩句!有D人一直以為我係靠同貞姐D關係而可以0係度做,咁諗就大錯特錯,我一直唔識貞姐,而我更加無受任何關照!我只係識得其中一個已經無做既CE,而呢個人同貞姐係好朋友!但就完全唔關我事,我一樣要填FORM!講番呢個男仔,我仲記得當時我TRAIN佢BO!佢有一次仲想同阿琳炒!不過最後無事,當時佢好似好聽我講,可能我跟過佢幾日,而且我又唔覺得佢差,係脾氣大D姐!我當佢好似細佬咁教,所以好有親切感,今次我仲請野佢食!無咩所謂,反正都好少機會見!

今日同新同事阿康一層,我覺得佢好好玩,我同阿恆係咁幫佢改花名,佢都唔會惱,埋數有$36XX,之後同既哩,大隻妙食野,佢地話今日好忙,可能我6C啦!又唔多覺喎!呢排咁多小朋友戲,都係下晝最多姐!

琴晚好好訓!訓到今日都唔願醒咁滯!今次比賽無之前既緊張同訓唔著,唔知點解呢?我諗係自己心態已經唔同左,所以好多野都唔到我諗,唔到我煩,一切已經變得無所謂,又或者一切已經睇得唔重要!今日無去攪野之餘,約左安達同嘉豪佢地去食野!仲要遲到!食完野之後就去左打青少盃,今日要同海峻爭出線,所以實在是許勝不許敗!比賽詳程,容後再講!

打完比賽落雨落到狗屎咁大,之後就BOOM BOOM聲趕返工!今日返18-25 6C,一返去以為自己係3C,所以去左幫手,之後先知係6C,先上返去幫手,今日都算忙,所以自己都會埋多次數!唔係信唔過人,只係想夜晚時唔好咁多阻滯!又比我發現錯處!不過無咩所謂啦!少少野姐,好快攪掂!我D$好易"ZIP"哂落DRAW底!本來SHORT左$38,之後又搵番兩張$20,所以變相係多左$2,埋數得$4000左右!收工後同大隻妙,阿詩去食野,公司真係好唔掂!BAR END既人睇黎越來越少!返屋企果陣撞倒BB2號!同佢都好有緣,已經撞倒起碼3次,搭車時係咁傾計,今日傾唔夠呀!下次一定要再傾!

講番今日場比賽!基本上對面有4個都係以前D舊隊友!打得比賽邊個都想贏,但呢場絕對係為左名義而戰!對比起人地隊波,我地內部絕對無問題!唔會有內訌或者不和呢D事發生,因為大家已經好熟,而家留得0係曉青既,都唔係為咩,而係為大家既感情而打,但我真係唔想比人睇死!所以我自問今日會全力以卦!但可惜結果都係以失敗為終結!雖然我地今日用新陣黎應戰,但我覺得完全唔關個陣事,邊個人去打邊個位都唔係問題,問題係打波係6個人既,唔可以靠一個人!例如起倒人地一球波而帶來一個反擊機會而把握唔倒,仲要自己打失送分比人,果一刻真係好失望!我唔係要怪責邊位隊友,只不過我只係想大家比賽時可以一條心!我都係覺得大家唔夠團結!隊友有野做既我會明白,但唔該唔好遲到,我地已經出名慢熱,仲要遲黎熱身!係咪自己都要負D責任?今日絕對係比上次打得差好多好多......對手比上次弱,但我地表現就更差!開頭第一局我真係好比心機去打,好比心機做掩護,我100%明白我0係隊入面既角色---掩護比人進攻,一傳一到,我就一定好比心機跳!我仲打左一球落地已經好難得!第一局好快就輸左!不過大家都知道第2局絕對有得追!好可惜,第2局最終都係輸埋!今日自己表現絕對係肥佬,平時守倒既波,今日又守唔倒!我地每一個都好想贏!不過可能越想贏,就越發揮唔倒!今日人地既一句說話令我自己打得有D急躁!仲有D打情緒波!打到自己好"汶",仲好"汶"其他隊友點解有機會都唔識把握,但諗深一層,自己又何嘗唔係失左唔少分,完全守唔倒波,講真,對比今日落場既隊友,我絕對係老球員!講既唔係年齡或球齡,而係打左曉青既時間,唔經唔覺,都已經打左4年有多!作為一個老球員,我都未必可以帶起大家,有時自己會諗,究竟我落場既作用係咩?今日呢個感覺特別強烈!守波既又唔輪到我,攔網又唔係好,殺波更加唔會,又或者係我根本比唔倒信心阿賢,所以佢SET得好少波比我打!上次場比賽實在太明顯,對面絕對係當我無到,直情放棄唔攔我,去攔阿輝既大搥!又或者我真係技不如人!好多野做得唔夠好,況且比我都未必拿倒分,咁不如比阿輝啦!我都係咁諗,唔比波我仲好,但好多人都話我咁諗心態唔好,不過我太清楚阿賢既BALL路!快攻只係掩,大搥先係拿分既!所以我好明白,無波打既都無所謂!好想守好每一球,我自問已經好盡力,到最後24:18,真係想放棄啦!咁既心態真係好差,自己表現完全對唔住大家,更對唔住阿輝,我知佢好博,開頭打既心態真係同佢一樣,不過自己真係唔掂啦!所以我絕對係令阿輝失望!SORRY!場波已經過去左,而家講咩都無用!

我又遲到啦!今次仲遲左22分鐘!鬼咩?車就上倒,無啦啦大塞車!北角就開始塞,一直塞到去隧道口,完全唔知佢塞咩?好采有人陪我傾!不過D人又無記性,算啦!我原諒佢!今日返9-18:15 3C,返到公司!即刻落去開BAR早D野!其實都好趕,第一場開9:45,極速攪掂D野,一早就有班MK LOOK既古惑仔黎睇戲!成13個人,佢地都買左好多野食!不過就係咁食煙,我咪叫佢地入廁所食!佢地都無咩野!我諗佢地都好肚餓!入左場之後起碼出黎買左5次野食!有個好攪笑同我講佢叫"金刀二"岩岩收工!我咪問佢地係咪好肚餓,佢話岩岩收工所以好肚餓,超頂癮!之後就食飯!今日其實唔係好忙,不過係咁REFILL其他野,中杯,大袋仲有其他好多野,入場又入得勁密,基本上都無咩停過!下晝有2條8婆師奶黎買KERORO餐,盛惠$38,佢比$108我找,點知係有3個1毫子,當時阿華都0係度,不過我完全無理佢!我咪問佢有無$1,或者兩個5毫子,佢話無!我話1毫子我地好難找喎!一係收你$100,找$62比你啦!佢話就係想比我找左D毫子佢!我都好串話得啦!收你$107得啦!我照找$70比你啦!之後佢話都未聽過人地話唔收1毫子!我無理佢,之後阿華話咁樣做自己蝕底,比人投訴就唔好,我一於好少理,我係咁架啦!果$1我當跌左比乞兒!之後埋數全中!都有$4000左右!之後執埋哂D手尾就收工!

臨收工就要我落去收電視BANNER!頂!已經趕架啦!真係麻煩!之後坐地鐵過荃灣!點知咁岩大家搭埋同一班,不過就一頭一尾!約左0係下個站等!我覺得好攪笑,之後人地0係美孚落!果幾個站既旅程我都覺得好開心!真係好想長D,咁岩今日又換左個禮物比人!順便送埋啦!之後再JOIN阿佬佢地食野!就過蕙荃打波!今日主要係青少盃既班底去打FRIENDLY MATCH!ALEX同阿賢都夾過幾場,效果都唔錯!今日防守同一傳都幾好!聽日又要打比賽!好想贏!呢場係為名義而戰!因為對手係以前既舊隊友,希望大家發揮好D,我地絕對有機會!走果陣0係地鐵洽眼訓,出左金鐘先知自己無拿把遮!見左架地鐵關門,之後諗倒架地鐵0係中環總站!應該轉頭會開返過金鐘去荃灣,好采我又記得個車廂編號!之後0係樓下月台等返架車,好采最後都比我拿得番,其實點解我咁緊張?因為把遮係大孖既,我都唔想整唔見人地D野!總之今日同地鐵好似結下不解之緣咁!