10:00左右佢地就叫左我起身,之後我就同隊長落左去食早餐,我地又唔記得帶張餐券落黎,人地唔比我地入,所以又要返上去拿過,個自助早餐真係唔錯,都幾多野食,中,西式大部分都有齊,不過比左咁多$,唔多D野食點得?話哂都係5星級,同我地上次廣州住果間真係差天共地!之後就上返房執野CHECK OUT!今日第一場打13:00,所以阿佬佢地又一早過左去霸位,我地之後都過埋去,頭場係美國對多明尼加!之前兩隊互有輸贏,所以今次應該都幾好睇!今次都打足4局,不過就係美國贏!有一球問題球,SCOTT走去同球證理論時,講左一句OH!MY GOD,我地個位太近,所以完全聽得好清楚,超攪笑,可能呢D就係球員既真性情!我幾鍾意既9號今日無出場,美隊D人真係好NICE,完場後ALEX同阿佬去左另一邊問SCOTT拿簽名同影相!佢地都有求必應,而且個個都笑容滿面!我本來都想過架!不過最後都無去,算啦!之後就到戲肉中國對巴西,不過今日中國真係打得幾差,一傳唔好,太依賴大搥,楊昊比人攔死哂!有個位慘到得2個人接一傳,無左周蘇紅真係差得好遠,今日只有攔網唔錯,其餘既真係慘不忍睹!係咁捱打!打左1個鐘12分鐘就打完,3:0輸左,希望之後會越打越好啦!
等埋抽獎之後就走人,我地決定過金莎豪賭,走攪左竟然見到巴西隊幾個人,包括3個中間同2傳,其實都可以搵佢地影相,之後有D人叫佢地影相佢地都肯,不過佢地又唔係我既至愛,所以都係無影,但近距離睇佢地真係好高!高我成個頭!跟住我地就入左金莎食野先!多謝隊長請食飯!基本上我自己都無咩比過$ 0係食方面!真係慳唔少,之後我地就去左玩大細機,我只係會用$200慢慢玩,玩左無耐就輸哂!當我諗住玩完唔玩既時候,竟然比我用$10博左31倍返黎,所以又唔駛走住,所以我決定我贏返個本後就會唔玩,呢點做到啦!之後又未夠鐘,見部輪盤機好似幾好玩!又忍唔住玩多$100,點知玩玩下又比我羸左$300,幾好采,而且呢部又幾好玩喎!臨走時見到有張大小"台"好似開得幾有頻率,就同隊長每人$50博一博!點知買細就開大,另外有個男人買10次都贏8次,諗住跟住佢買,點知之後跟佢買又輸多$50,真係激死,所以最後只係贏$200,但都好過無啦!贏幾多整定既,無得怨,RICKY買左22:00船,所以佢走先,阿佬佢地原本想早走,點知D船都已經無哂後補位!所以佢都要同我地一齊坐23:00船,入閘前幫人買野!成24:30先返到尖沙咀,過到香港坐巴士又趕唔切,所以就行餐死過左火車站坐巴士,真係熱到飛起!總結今次澳門之行其實都係好玩既!
今日又要早起身,因為我同隊長,RICKY要過澳門睇波兼豪賭!約左9:30港澳碼頭等,遲左少少,一起身又收倒個SMS!我覺得實在有太多巧合,開始覺得有D假,但又唔可以排除唔係真,我都唔知信唔信好,不過過左一陣我既潛意識又信左,但我真係唔可以輕舉妄動!過到澳門第一站當然係醫肚先,今次RICKY會請我地食飯,因為佢無同我地一齊訂酒店,而我地又會比佢同我地一齊訓一間房,所以佢會包我地兩餐!我地去左一間酒櫻飲茶,雖然唔係太好食,但都食得好飽,之後就過左酒店CHECK IN!呢間係5星級酒店,所以都算幾靚!上去拿左房之後就過體育館,行過去3分鐘左右就到!已經可以入場坐,阿佬,大細孖佢地星期5已經黎左,所以佢地一早就黎排,仲霸左幾個靚位,又係坐第一行,我個位就對住條3米線,好前好近!仲一定有得上電視,我地早左成個鐘入場,等一陣之後就見到美國同巴西球員0係我地面前猜波!人地同我地真係差得遠!D基本真係好我地好多,不過人地日日都練,我地又唔係,所以根本無得比,過左無耐就開波,其實節奏真係好快,同電視睇真係唔同,美國好有機會同巴西打足5局,不過爭D就真係爭D!始終關鍵時刻把握唔倒,好采都打足4局,之後到中國對多明尼加!中國打得唔好,仲有機會比人追番局,中國係唔識接飄波,所以一傳真係麻麻,組織唔倒快攻!所以中國其實贏得唔太光彩!
睇完都已經19:30左右,之後大家一齊行左去大3巴附近食野,阿佬佢地去左食其他野,我,RICKY同隊長就去左食葡國野,我一定會跟住佢地,因為又有一餐免費野食,雖然要等成半個鐘位,但呢間野確實係唔錯,而且又唔駛比$,所以食咩都無所謂啦!食完之後就過左手信街買手信,老娘又話要食杏仁餅!所以一定要買,另外買左D野比人同自己食!果度D人係咁不斷叫你試食,真係食得嘔!之後就坐的士返酒店,隻左眼又開始痛,唔知點解呢排耐唔耐就會痛下,尢其係唔夠訓既時間!隊長同RICKY話出去賭$,本來我都好想去,但隻眼真係唔太舒服,而且又好累,所以決定留0係酒店抖下好過,佢地去到1:30左右先返,又有得食免費宵夜,食完無耐大家都訓啦!
今朝6:55又要起身BOOK場!好眼訓,之後沖個涼又返工,都唔知今日返咁早做咩?竟然要返8:45-18:15 3C,早場<日本沉沒>開9:30,真係搵鬼睇咩?咁早,得果小貓三幾隻!返工果陣PAT水 PAT對上個位撞左埋D手柄度,唔係痛,係"秘",而家都有D"秘"勁慘!早場又唔係多人睇,之後就同BB出左去食飯,想幫阿琳買本便利都唔得,可能接左投訴比人收起哂,又或者真係賣哂!生意唔太好,17:15先埋數都係得$2000左右,真係差!不停FILL野同搵野做,真係多得大隻妙唔少,因為佢琴晚有劑爆谷唔記得落糖,結果撈埋落D正常爆谷度,我攪左幾耐先撈返埋!真係玩野!
收工就如安達,RICKY,隊長,阿10,阿樂佢地一齊去食野,因為大家都唔係好識去個土瓜灣體育館,阿樂又話識,所以就靠哂佢,去左阿BOAT介紹間野,又無佢講到咁好食,我覺得算差喎!之後就一齊坐小巴過去!今日對HUMPHREY D朋友,人地都幾高架!我地又算矮,所以都預左要以快打慢!,不過今日一傳大家都實在太差!所以完全發揮唔倒,最後阿樂,隊長同安達都有SET過!不過我地今日一場都無贏過,但大家都發揮得唔好,所以無得講既我覺得今晚似FUNNY MATCH多D,之後就坐巴士返屋企啦!叔搵人搵左成晚都搵唔倒,有D擔心喎!
